Schweiz

Schweinisches hat durchaus Platz bei den Schnitzelbängg – der Schnitzelbank Schunggebegräbnis bei der Hauptprobe 2016. Bild: KEYSTONE

Trump, Drogen und Jogis Hoden: Die besten Schnitzelbängg 2017

Vor den bissigen Satiren der Schnitzelbänkler ist niemand sicher: Weder Staatsoberhäupter, noch Fussballtrainer und schon gar nicht Basler Lokalpolitiker. Am meisten einstecken müssen aber – wen wundert's – die Ziircher. Viel Spass mit den besten Schnitzelbank-Väärse 2017!

06.03.17, 18:06 07.03.17, 06:35

Donald Trump

Häälooo...ohhh... – Jä, was isch mit dir los, bruchsch du ägscht e Kuur? – Nai, ich bruuch glaub am beschte e Intimrasuur!! Ha im Pissoir schnäll aabegluegt, was fyr e Schand! Dä gseet genau glych us wie der Donald Trump!!

Wyybuure (Bebbi Bängg)

Syt Wuche lüttet s`Delifon bi uns fascht Daag und Nacht sorry heissts am andre Änd i ha e Schissdrägg gmacht.
E Ami ischs und s`duet em leid, dass är uns so quäält
är het sich halt wie viili au – eifach nur verwäält.

Familie M. Steiner (Bebbi Bängg)

Ych hätt e Värs vom Trump bereit! Aber s gilt «Inländervorrang light!»,
Wenn mir dää jetze wurde singe,
mien mir ain vom Glarner bringe!

Bangg Rott (Bebbi Bängg)

Dr Trump luegt bi Olympia flissig mit
Ob‘s bim Stabhochsprung e lange Alauf gitt
Das will är wüsse, do loht är sich nid lumpe
Wie hoch könne die Mexikaner gumpe?

D Laggaffe (BGS)

Noo de Waale z Amerika
Lytet dr Gilbert Gress em Trump grad aa:
«Ych gratulier und mir duet schyyne
dy Coiffeur isch dr glyych wie myne»

Käller-Assle (Bebbi Bängg)

S Hilly sait zem Billy: «Miir bruuchen e Plan B! Dr Trump muess wägg, daas will y,
als Präsidäntin wott mi gsee.»
Druff sait dr Billy denn zem Hilly:
«Yych hilf der, muesch guet loose,
Y lyt graad dr Levinsky aa, die sell em ain go ...»
– sali zämme.

D'Schlyychwäärbig (Bebbi Bängg)

S Runde muess ins Eggige hän sii als gsait
Dasch so ne primidivi Schwoobe-Schutt-Wyyshait
Sii die gilt syt neischtem au fiir d US Waale
Well d Amis maine s Eegglige miess ins Ovaale

Die Unerheerte (BGS)

Erdogan

Dr näggscht Väärs isch e Loobgedicht iber e gwissen Erdogan.
Dr ainzig woori Demokrat, ganz ooni Gressewaan.
Wenn nur dänggsch, waas von em haltisch,
denn duet är dii nit gwääle.
Aaber wenn s nit fir di bhaltisch,
kaasch dyni Zälle sälber wääle.

D'Schlyychwäärbig (Bebbi Bängg)

Putin

I haa SIRI ganz im Verdraue gfroggt,
ob e Trojaner i mym iPhone hoggt.
Kai Angscht, maint SIRI, mer sin elai,
Moskau macht Pause bis am zwai.

Bildsteerig (Bängg-fir-Basel)

Basler Lokalpolitik

Droge, Sex und Alkohol, Bier und e paar Klaari
dr ganz Daag nüt rächts mache nur e bitzli Larifaari.
So richtig eini duurenuudle bis es glepft und zischt
dr Jungi weiss jetzt ganz genau –
«Y wird Basler Bolizischt!».

Familie M. Steiner (Bebbi Bängg)

Sali wie gohts –Du, muesch jetz lose: Bim Schwimmen im Rhy, krieg ich am lingge Bai E Grampf und ich dängg: I kumm nie me hai. I schaffs no zer Boje – heb mi dra wien e Rind, Do mergg i, gopferdeggel, dasch jo im Baschi Dürr sy Grind!

Wyybuure (Bebbi Bängg)

«S Schwyzer Volch, das straalt vor Glück, hett Chraft und Energie,
Und Aarmuet haimer kaini, well mer Eidgenosse sii!»
Der Frehner rieft: «Kai Aarmuet in der Schwyz – e Super-Laischtig!»
Doch grad bi däm isch d Aarmuet gross –
politisch wie au gaischtig.

PereFiss (Bebbi Bängg)

E Schott verlauft sich am Tattoo,
verirrt sich ins Quartier,
Är schländeret durs Rotliecht und wird langsam blau vom Bier,
Är schwanggt de griene Linie noo, e Gritte kaifft en aa: «Faar ab, ych duld kai Konkurränz –
jesses – s isch e Maa!»

PereFiss (Bebbi Bängg)

Dr Eric Wäber lauft bim Roche Turm unte duure
No gheit e Yysklotz ihm vom Turm diräggt uff d Schnuure Do seit d Frau Müller, wo das gseht: «Das isch no glatt» «Me seit doch immer, d Roche, die machi nüt für d Stadt»

Babberlababb (BSG)

Veganismus

Vegan, biologisch, laktosefrei
und kai Gluten, dr letschti Schrei
wäär so lääbt däm ka’s bassiere
duet me am Änd denn komposchtiere

Alpreröösli (VSG)

Sich gsund ernääre isch momentaan d Devyyse
my Doggder duet mer au dr Daag dermit vermyyse
«my Buuch syg z digg»,
y saag em: «Mach ghai Gschrey»
«Das isch doch alles numme gsunds Omeega drey»

Giftnuudle (Bebbi Bängg)

Die besten Bilder vom Morgestraich

Plastiksäckli

Bim boschte, liid iich immer Gwaale
muess füür Säggli fünf Rappe zaale
dehäim bin iich no schlimmer draa
mii alte Sagg wot niemer graatis haa

Alpreröösli (VSG)

Ausschaffungen

Äär duet erbaarmigsloos uf glaini Kinder schiesse
Und no vyyl schlimmer: als nid no de Reegle griesse
So ain gheerti ussgschafft und zwoor zimmlig schnäll
So ne Extremischt Sii wie dää Wilhelm Täll

Die Unerheerte

Darbellay

Darbellay und Löw die hänn `s glych Problem
Doch wie si`s löse, het jede si System
Wenn`s unde juckt, kratzt sich dr eint am Ei
Und dr andr liggt, halt zwüsche fremdi Bei

D' Laggaffe

Bachelor

Dr lètschti Bachelor isch è riise Fään vom ùmmeschmuuse
är knabbered und schlabbered und schläggt an syne Muuse
doch bi dere ùsem Muotatal do wird är blaich und kalt
wie saage d Wätterschmöcker «chli stinke muesses halt»

USR III

S Gezeeter Holdrijo isch linggs und rächts enoorm
Wäg dääre bleede Unternäämensstyyrrefoorm
Ych ha nai gstimmt – Sii daas saagi unschiniert
Als Katolygg stimm ych doch nid fiir reformiert

Die Unerheerte (BGS)

BaZ

Dr Somm schrybt sich in dr BaZ fascht d Finger wund
Är wott, dass Basel ändlig e rächti Regierig bikunnt
Fascht hätti dä Versuech Erfolg kenne haa
Laider het s kaine glääse kaa

Die Haiggle (BGS)

Ziircher

Züri brucht e neue Name – und zwar ein mit Rasse Sommerau – hän mir uns dänggt – würd prima zur Stadt basse E Namenswäggsel isch ächt böimig und au no richtig schlau Denn Züri isch im Winter scheisse – und im Sommer au

Bajass Omega (VSG)

S BAG het doch e Sex-Umfrog gstartet,
Wie d Schwyzer denn Sex hänn,
jä uf das hänn mir gwartet.
D Walliser haige s am liebschte anal
Und d Nidwaldner am liebschte vorussen im Tal.
D Wadtländer stelle glatt die maischte Freier,
D Basler bevorzugen e flotte Dreier.
Und lut däre Studie, haigs vo allne Schwyzer,
In der Stadt Ziiri doch die maischte Wichser.

Wyybuure (Bebbi Bängg)

Bild: EPA/KEYSTONE

Im Appizäll deert hänn’s dr Alpabstiig all Joor und de Bärgstyger stoht nonem Gipfel dr Wandabstiig bevor und z’Basel macht yss dr Källerabstiig all Joor gluschtiger aber dr Ziircher Abstiig finde mir vyyl luschtiger.

Bäffzgi (VSG)

In Tschernobyl, bim AKW
Mir händ das am Fäärnsee gsee
Jetz isch dört e Deggel druff,
um d’Umwält vom Übel z’schütze
Mir sind sicher, so n’e Deggel, wurd au in Ziiri nütze

Blagèèri (VGS)

Wenn am Säggsilyte d‘Zircher um dä Schneemaa ummeritte, denn hetts se paggt, und s‘letscht Joor hett‘s däm Böög noch 3/4-Stund efang dr Grind verjagt. Wenn ich dehai furt fahr, grieg ich au Schmärze im Kopf – je witer ewägg, je meh, und dr Grind verjagt‘s mir denn, wenn ich d‘Ortsdaafele vo Ziri gseh.

D'Schnaps bagge (VGS)

Fussball

Meine Damen und Cherren, missen wir sein nicht bleed, will ich, dass alle Leute in Schweiz das Weg, das will ich, mit mir geht.
Habe ich lustige Arbeit und wenn rede ich deitsch, werde ich froh.
Jä – toll, Herr Petkovic, aber s‘wär no geil, wenn me sie au wurd verstoh!

D'Schnaps bagge (VGS)

Dr Canepa und dr Heusler sitze ùf em Jungfraujoch dringge zämme waarme Thee und luege aabe in das Loch doo bikùnnt dr Heussler Schiss und ihn verloot dr Muet
dr Zircher sait em hèb kai Angscht abstyyge kanni guet

Batallioonsglùnggi (BSG)

AfD

Du Babbe, isch die AfD, E Fischerclub mit Huus am See? Nai, die findes numme geil, Luuthals z brille «Petry, Heil»!

D'Emigrante (BSG)

Verstorbene Prominenz

E Hampfle groossi Muusiger hett d Wält s letscht Joor verloo:Der Bowie und der Cicero hänn baidi miesse goo, Au Cohen, Prince und Michael sinn verglemmi nimme doo, O Gott, wurum hesch denn der Gölä wytersinge loo!

PereFiss (Bebbi Bängg)

Wo dr Fidel Castro hett miesse go
isch uss em Sarg e Räuchli ko
sy letschti Havanna, hänn mer iberlait
nai, au s Samsung Handy hett adie gsait

Dipflischysser (Bebbi Bängg)

Roger Federer

Wo dr Roger geg‘ dr Wawrinka muess spiile
Sesch ihn immer irritiert zur Mirka schiile
Im pinke Pulli wartet sii scho näb em Platz
No dänggt är: «Du, do spiil i lieber non e Satz!»

Babberlababb (BSG)

Uber, Zalando, Airbnb & Co.

Im Internet hän mir welle – e Ferieschnäppli bueche
Und sin bi 400 Ferieabieter e Hotel im Netz go sueche Nachere Wuche no 50 Aagebott – das söll no aine raffe Zwai Wuche spööter hän mir gmerggt –
mir mien wieder go schaffe

Bajass Omega (VSG)

Bald schiggt Zalando Päggli mit Droone
Diräggt dört aane wo mir woone
Mediamarkt, möcht Liefer-Roboter, die düüse dur s‘Quartier
Bi mir dehai, isch alles bim Alte,
do bringt mir d’Frau no s’Bier

Blagèèri (VGS)

Bild: EPA/KEYSTONE

D' Schwoobe

E Familie uss em Ussland wohnt neu in unserem Huus
si sin sehr nätt si gän uns d`Hand das macht uns ganz konfus.
Rede unseri Sprooch sin integriert das mien mir loobe eigentlig pherfèggt – wäres nur nit Schwoobe.

Familie M. Steiner (Bebbi Bängg)

Poststellen-Schliessung

Mi Groossbabbe hänn’s letschti in dr PUK iigschlosse
Dä het so richtig dr Voogel abgschosse!
Daagelang isch dä in dr Wältgschicht ummegirrt
Und gfunde worden isch är z Davoos – vellig verwirrt Derbyy het dä Armi numme dä Wääg absolviert
Will är e Poschtstell suecht – wo no exischtiert!

Giftspritzi (BSG)

Die neye Drohne bi dr Poscht, das duet uns sehr entsetze Die sölle schins in nägster Zyt, dr Pöstler ganz ersetze. Jetzt hän mir richtig Angscht dervoor, hän scho vyll Alpträum gha Fir uns haissts denn ab sofort – im Bett muesch wieder draa.

Wildwäggsel (BSG)

Pokemon

Vor em Roothus stehen Lütt es herrscht e gedämpfte Doon
Gits wäg em Baschi Dürr z‘Basel e Revolution
Oder wäg em Parkplatzabbau e Demonstration
Nanai s isch der besti Platz für das Go POKEMON

Blagèèri (VGS)

Bi däm Pokemon-Spiil settsch jo Monschter sueche
Aber y find irgendwie kaini und bi nur am flueche
Ych bi denn in dr ganze Stadt ummegrennt
Numme mi Handy het aifach kai Monschter erkennt
Stunde speeter han y vo däänen aber Dausigi droffe
Jä ... ych Duubel bi bis uff Ziiri gloffe!

Giftspritzi (BSG)

Handschlag-Verweigerung

E jeede muess si Scheff begriesse, s herrscht e Handschlag-Pflicht,
Und wenn das ain nit mache wott, no schleppt me iin vor Gricht!
Vor langer Zyt hett ain emool, doo in unsere Lande,
Au sym Scheff nit Griezi gsait – esoo isch d Schwyz entstande!

PereFiss (Bebbi Bängg)

Zem di im Drämli an dr Stange heebe und bim Schnizze bruuchsch si au. Bruuchsch si zem dr Abfall in dr Kiibel leege – zem an dir spiilen ooni Frau. Wenn di gratzisch, wo s dr Yogi bisst, dien die Pfoote gruusig stingge! Drum, diir Leerer, diend nit so, dien dääne Schieler lieber wingge.

D'Schlyychwäärbig (Bebbi Bängg)

Wott e Schieler der Leerere d Hand nit gää,
denn sott me daas nit so draagisch nää.
Das isch doch haarmloos, wenn me dänggt,
wo der Trump de Fraue aane längt.

Bildsteerig (Bängg-fir-Basel)

Mike Shiva

Das Bild do isch schregglig, daas isch e Skandaal.
E Fiidle wo zueggläbt isch, hängt yberall.
Woorschynlig goots do um Hämmorhiden am Schyyn a ... – Naii, das uf däm Plakat isch doch nur der Maik Shiva!

Wyybuure (Bebbi Bängg)

Horror-Clowns

Nach de Wahle hett dr Blocher dr Nägeli droffe
Mitenader sin si dur d’Staine gloffe
E Binggis maint das isch denn schön
Lueg Mammi derd sind zwai Horror-Glön

Blagèèri (VGS)

Bim Schneider Ammann mecht i härzligg mi bedangge
Fiir syy Färnsee-Aaschprooch grichtet an die Grangge wennd en gseesch und reede heersch so monodoon
denn waisch miir Schwyzer hänn jetz au e Horrorgloon Was nid vergässe derfsch das isch derbyy no s Scharfe
dr Johann bruucht derzue jo nid emol e Larve

Giftnuudle (Bebbi Bängg)

In Aarau und in Neuchâtel gits ney e Phenomeen.
Au in Wohle, Gänf und Winterthur hänn alli Angscht vor Gleen.
Au z Chiasso und in Wil het me Horrorgleen scho gsee. Derby isch s d Frau Canepa gsi uff Challenge League-Tournee.

D Rätschbääse (BSG)

Punkt 4 Uhr war Startschuss zu den «drey scheenschte daag».   Bild: EPA/KEYSTONE

Blocher

Der Blocher isch heftig uff d Naase gracht. Vor der Landig het d Naase d Mäldig gmacht: Naase an Hirni, es gfallt uns doo, s isch Schwyzer Boode, der Räscht kaa koo.

Bildsteerig (Bängg-fir-Basel)

Muslime

Obwool sich ainigi beschwere, d Muslim mien jetzt schwimme leere. Dä Entscheid macht gar kai Gspass. Wärde doch im Wasser d Bombe nass.

Käller-Assle (Bebbi Bängg)

Samsung S7

D Regrute hänn Verschiebig, es goot zem Waffeblatz.
S git e Handgranaateniebig, jede griegt e Satz.
Dr Müller gniblet scho am Ai,
dr Meier luegt duurtriibe:
«Die Handgranaate nimm i haim, y schmaiss mi Samsung siibe!»

D'Schlyychwäärbig (Bebbi Bängg)

Bi Samsung-Gräät kha’s guet bassiere
Ass‘ die Siechen explodiere
Drum khasch si jetzt ganz exklusiv Zrugg gää – 
will s’isch explosiv
Drotz allem han ych sinnvoll dänggt
Und ains dr Schwiigermueter gschänggt!

Giftspritzi (BSG)

Tesla

Du Hans, bisch du aigentlig mit dim Tesla zfriide?
Hejo, das Auti ka alles! – Jetz duesch yybertriibe! – Naai: Parggiert ellai, faart ellai und zem guete Räscht, Goot är, wenn ich nid grad mag zer Frau ins Näscht!

Wyybuure (Bebbi Bängg)

Sport & Doping

Bim Dischgebätt danggt me firs dääglig Brot
und hoolt soo d Hilf vo Oobe ins Boot.
Bim Putin dien sich, isch doo myy Gedangge, d Sportler firs dääglig Dooping bedangge.

Bildsteerig (Bängg-fir-Basel)

Cannabis

Miir hänn ghai Instagram Account, sinn ghaini Blogger und au des bleede Facebook haut is nid vom Hogger
miir bruuche kaini Tweets und Posts wo jeede maag
s ainzig wo mer amme hänn isch e Hasch-Daag 

Giftnuudle (Bebbi Bängg)

Schneider-Ammann

Mängsmool griegsch du, maint my Schatz, e Lacher fir d Pointe im letschte Satz. Lache d Lyt vo Aafang aa wie bleed, denn ischs e Schneider-Ammann Reed.

Bildsteerig (Bängg-fir-Basel)

Bonus: All-time Best-of

Do seit mi Frau zu mir im Bett / kumm, zeig mr mol di Minarett / do sag i: «Nei, will wäg dr SVP / dörfsch nur no mini Glocke seh!»

Bonus 2: Best-of 2016 im Video

(wst)

Das könnte dich auch interessieren:

Warum hunderte Fussball-Junioren gegen einen Millionär marschieren: Ein Herrliberger Drama

Mehr 2017 geht nicht: Die unfassbare Geschichte des weinenden Keatons – in 4 Schritten

Ein Nigerianer stirbt nach seiner Ausschaffung – was die Schweiz damit zu tun hat

Amis lynchen Hai mit Speedboot und grinsen – jetzt tobt das Netz wegen dem Video

Hol dir die App!

Zeno Hirt, 25.6.2017
Immer wieder mal schmunzeln und sich freuen an dem, was da weltweit alles passiert! Genial!
Abonniere unseren NewsletterNewsletter-Abo
7
Weil wir die Kommentar-Debatten weiterhin persönlich moderieren möchten, sehen wir uns gezwungen, die Kommentarfunktion 72 Stunden nach Publikation einer Story zu schliessen. Vielen Dank für dein Verständnis!
7Alle Kommentare anzeigen
    Alle Leser-Kommentare
  • Mamba 08.03.2017 13:21
    Highlight und die lokal Zeitung zitiert aus Watson ;)
    0 0 Melden
  • J.S. Bond 07.03.2017 22:40
    Highlight Ich möchte lieber Jogi's Hoden begegnen als Trump !
    1 0 Melden
  • Bebbi 07.03.2017 15:07
    Highlight ’s Nivoo vo däre Uuswaal… ’s khaa nur e Zircher gsi sy, woo nit waiss, was e Comité-Schnitzelbangg isch!
    11 2 Melden
  • -woe- 07.03.2017 09:55
    Highlight Mir gefällt die Basler Fasnacht. Alle Leute am Umzug - ob mit oder ohne Maske - tragen den Fasnachtspin und werfen mit Konfetti. Einfach härzig!
    18 0 Melden
  • Benji Spike Bodmer 07.03.2017 07:38
    Highlight Ihr chönd ja vo de Basler halte was ihr wänd- aber Schnitzelbängg sind eifach Schnitzelbängg ^.^
    25 1 Melden
  • 2sel 06.03.2017 22:21
    Highlight Hoffentlich liest de Donald nöd mit susch baut er no e Muur um Basel...
    16 5 Melden
  • Coppoletti 06.03.2017 19:55
    Highlight Was habt ihr gegen Comité Bängg?
    30 5 Melden

Drei neue Hochhäuser und einen Stadtpark: Herzog & de Meuron bauen in Basel  

Ein neues Stadtquartier mit Hochhäusern und grosszügigen Freiräumen soll im Teilgebiet Nordspitze auf dem Dreispitz-Areal im Süden von Basel entstehen. Dies schlägt das städtebauliche Konzept von Herzog & de Meuron vor, das den Studienauftrag gewonnen hat.

Der Entwurf der Basler Architekten Herzog & de Meuron stellt gemäss den Juroren einen beispielhaften Beitrag zur qualitätsvollen Verdichtung dar, wie es in einer Mitteilung der Planungspartner Christoph Merian Stiftung (CMS) als Eigentümerin, Migros als Hauptnutzerin sowie des Kantons Basel-Stadt vom Dienstag heisst. Zum Studienauftrag eingeladen worden waren sechs Architekturbüros.

Genutzt werden soll das Areal durch Gewerbe, Verkauf, Gastronomie, Bildung und Freizeit. Zudem soll der Mix aus …

Artikel lesen