Solche Bilder werden wir dieses Jahr nicht zu sehen bekommen. Ganz ohne Schnitzelbängg musst du aber trotzdem nicht auskommen.Bild: KEYSTONE
Die Basler Fasnacht findet 2020 nicht statt. Zumindest nicht in altbekannter Form. Auf die Schnitzelbängg musst du jedoch nicht verzichten: Wir haben die besten für dich zusammengestellt. Sie enttäuschen auch dieses Jahr nicht.
28.02.2020, 20:0128.02.2020, 22:40
Sibel Arslan
Die PISA-Studie isch do z’Basel grauehaft missroote
Für Läse, Schryybe, Täggschtverständnis, git’s ganz mysi Note
D’Lehrer finde d’Usreed schnäll und die isch rächt penibel
Das sig dängg s’neue Bundesdütsch vo dr Arslan Sibel
D'Schuggerei
Hösch mach jetz s Liecht mol ah du Pfyffe
Het uns dr Dani live verzellt
Mir findes guet und s isch au nötig
Ass me s Dunggle bitz erhellt
Au d Sibel Arslan nimmt sich s z Härze
Montiert d Schiinwärfer s isch dr Hit
Jetzt duet si uff em Vello lyychte
Nur wiirgglig heller isch si nit
Mac Väärs
D’Arslan und dr Atici, die sind jetzt beidi gwählt
Dr Frehner gratuliert de zwei und luegt derby lyycht quält
Zwei Kurde neu im Bundeshuus, das sehn mir Schugger gärn
Mir hoffen ihri Demos sind denn künftig au grad z’Bärn
D'Schuggerei
Nationalrätin Sibel Arslan (Grüne/BS).Bild: KEYSTONE
Recep Tayyip Erdogan
Dr Erdowan, dä wott jetzt au en Öko-Auti baue
Gmäss ihm ka das denn jede fahre, usser villicht Fraue
Mit Aatriib durch lokali Technik, s’macht dr Recip heiss
Will zoge wird dä Charre vo sinre Lieblingsgeiss
D'Schuggerei
Du do am letschte Klimagipfel
Het d Greta voller Stolz verzellt
Si haig e neys Kondom entwigglet
Nochhaltig us Schoofhoor härgstellt
So Tierproduggt kenn me au wäsche
Und usserdäm gän si no warm
Dr Erdogan fühlt sich bestätigt,
Är nääm au immer Gaissedarm
Mac Väärs
Prinz Andrew
Dr Prinz Andrew ladet drum die Greta zue sich heimen yy
Zum Trinke offeriert är ä vegane griene Wyy
Är sait: Das Klima isch mr wichtig, das isch nüt Banals
Du schaffsch das, jetzt entspann dii, in dir steckt öppis Royals
D'Schuggerei
Isch dört Duchess of Sussex? Do isch dr Prinz Charles am Apparat.
Halb in Kanada, halb-in-Ängland,- sag was söll denn dä Spagat?
Kumm lieber zrugg, du Ami-Gööre und vergiss dy Freiheits-Drang,
Sunscht goots dir bald wie mir und d Mamme ziet dir d Oore lang.
Die Aabrennte
Dr Donald Tramp verspottet d’Greta, das bruucht nit vyyl Muet
Zum Glück nimt sii das locker. -- Mir finde, die isch guet
So goot’s au em Prinz Andrew, är isch ab dr Greta griehrt
Will s’Schicksal vo so Maitli ihn syt langem tief beriehrt
D'Schuggerei
FC Basel / Fussball
Kasch dir scho sälber s Fudi butze
Iikaufe goot au scho ellai
Waisch zää und zää git nit ganz dryssig
Bringsch dyni Wösch zum Mami hai
Kasch s Alphabeet scho richtig schryybe
Halt laider nur vo A bis D
Denn wärsch du sofort iigstellt dert bim Verwaltigsroot vom FCB
Mac Väärs
Bim FCB got’s mol ufe, mool abe, mol links mol rächts
Mol hindere, mol fyyre, mol Guet’s mol schlächts
Jetz leehn doch nid grad der Kopf lo hängge
Me kaa unmeeglig segglen und glyychzittig dängge
D'Ständerlampe
Dr FC Basel muess me loobe,
Fiert d Tabälle mänggmool oobe.
Und ganz pletzlig hoolt is YB wiider yy.
Ganz sportlig duet me hintersinne,
jä dr besser soll doch gwinne.
S goot um s Spiile, s isch dr Blausch, mir sinn derby.
Ob als erschte oder zwaite, baidi Clüb sinn logger druff.
Wär gwinnt isch baide schyssegaal,
Hauptsach GC stygt nimm uff.
D'Gwäägi
Nach Qualm und Rauch het’s im Letzigrund g’roche
No het der Schiedsrichter s’Spiel sofort underbroche
Wyter spiele, schreyt der Ganeppa, mi Frau die Kueh
Het im Raucherstyybli obe d Tyr nit zue
D'Ständerlampe
Russisches Staatsdoping
Mit eme Russische Athlet, ändlig isch‘s mr glunge
mit ihm z‘schwätze, aine z‘dringge, am Änd hän mir no gsunge
am Schluss wo n ych ihn denn umarmt ha «Au» do het‘s mi gstoche
und ych ha, s‘duet mr schuurig Laid, sy Dobingnoodle broche
D'Goldis
Donald Trump
Wär faart do übre Bärgsee und stüürt hässig richtig WEF, Davos?
S isch d Greta und si reist klimaneutral im sälberbaute Flooss.
Dr Trump kääm in dr Airforce One und das syg schaad meint si fruschtriert,
Well me Orange besser nit per Luftfracht transportiert.
Die Aabrennte
S git Kaffy ohny Koffein und Eiwyss ohny Protein,
und im Spunte bschtellsch e Börger ohny Rind.
S git Stargg-Bier ohny Alkohol, s git FCB-Mätsch ohny Gool,
Es git sogar no Bischef/Prieschter/Pfaffe ohny eiges Kind!
Hit kasch alles ohny ha – das gilt au in den USA
Dört hets e Kopf im Wysse Huus, dä kunnt ganz ohny Hirny uss.
D'Stroofrichter
Klima
Dr Trump bricht dr Paris-Vertrag
Will är Pariser halt nit mag
Dr Cassis fliegt au in dr Schwytz
Das kann är, will är heisst nit Rytz
D'Schuggerei
Australie brennt, doch nume Muet
Grilliert schmeckt Känguruh doch guet
Au Rindfleisch frässe isch dr Hit
Will gkochti Rinder furze nit
D'Schuggerei
Und d’Greta heig me sitze gseh
Am Bode vom ne ICE
Dört steggt sogar dä Zöpfli-Zwärg
Hinter’m Plastik-Kofferbärg
D'Schuggerei
Wenn wägem Palmöm dr Urwald verreggt
Blybt d’Hauptsach, dass s’Nutella uns guet schmeggt
D'Schuggerei
Furzen und Schnuufe oder e Drei-Minuten-Ai
Erzygt lut der Frau Thunbörg viel z viel CO2
Wenn ich die Greta nur seh, haut’s mi psychisch in Käller
No goot mer e Furz ab und ich schnuuf au viel schnäller
D'Ständerlampe
D Greta Thunberg macht s scho richtig,
sii sait s Glyyma, das isch wichtig.
D Wält wird wärmer, mai das schloot is uff e Durscht.
Jetzt finde vyyl die Geere bleed,uss em Land vom Smeerebreed,
das isch zwoor däänisch, sii uss Schweede, isch jo Wurscht.
Bim Thema Glyyma sinn mir still,
so schlimm isch s noonig allem aa.
Mir hänn au das Joor duss am Grill,
an Wiehnacht s Jäggli miesse ha.
D'Gwäägi
Kampfjets
D Amhärd kunnt wäg der Patrouille Suisse schyynts schampaar in d Bredouille
Jo, die Ghaimdienschtgschicht macht re e mulmigs Gfyyl.
Nämmlig, ass me vo Biel-Bängge cryptisch kennt iir Gschwader längge,
und denn fliege die nomoll uf Mümliswyl!
Drum wird ab sofort unverschlisslet au am Fungg nur Mundart grisslet.
Jetzt verfliege sich die Gleen, will sii d Amhärd nit versteehn.
D'Stroofrichter
Do isch d Patrouille Suisse, falls d uf der Laitig bisch
Kaa mer vo euch epper sage, wo Langebrugg isch
Mer sehn Lyt bim e Feschtzält und sinn wie uf Noodle
S hän alli d Händ in de Segg, wie sottigi wo joodle
D'Ständerlampe
Dr Trump maint ze dr Schwiz är wurd gärn
E so paar Tiger Flugi ha
Do sait em d Amhärd, los jetz Donald
Die sin vill z alt und hän Roscht dra
Umgehend schryybt dr Trump uff Twitter
Die Amhärd jä die isch voll dumm
S git dängg zem Flugi s Schwyzer Mässer
Und dr Mac Gyver baut se um.
Mac Väärs
Mondlandung
I ha mi riesig g’freut, as der Wessels doch no goot
Jetz bin ich aber g’spannt, wo’s dä ane schloot
Bi miner Wunschvorsttellige ha mi mängmool erdappt
Nur als Byspiel: D Akunft uf em Mond het glappt
D'Ständerlampe
Vor 50 Joor het denn dä Armstrong
E grosse Schritt für d Menschheit gmacht
Uf em Mond bi dere Landig
Medietechnisch het das kracht
Und bi dr Fyyr zu Jubliläum
Fyylt sich dr Trump ganz fescht ellai
Är wär domols au gärn drby gsi
Denn hindrem Mond isch sy dehaim
Mac Väärs
Megxit
Jetz kunnt zem Brexit no dr Mexit
Die Brite hänn e Bitzli buff
Dr Harry stoot halt zu dr Meghan
Und git drum s Prinzenamt grad uff
Är het jetz au mehr Zyyt für d Kinder
Und kümmeret sich liebevoll
Das liggt halt in de Geen vo Prinze,
me findet Kinder aifach toll
Mac Väärs
Der Prinz Charles mit den Ohre wien e Fläädermuus
Het d Camilla, oder anderscht gsait, e Ross im Huus
Im Gefolge no der Harry als keeniglichi Seel
Wo letschti au mutiert isch zem e Riese-Kamel
D'Ständerlampe
LGBTQ
Letschti het mi Junge mi gfroggt
Ob ich weiss was Transgender heiss
Denn hanem gsait das isch e Mensch wo
Was äs will si, nonig rächt waiss
Denn hän si in dr Schuel e Bsuech ka
Und wies dr Zuefall halt so wott
Heisst dä Bsuech Martullo Blocher
Und sythär het är Schuelverbot
Mac Väärs
Uns isch s egal schwuul oder lesbisch
Als Mensche sin mir doch glyych guet
Ob Mann ob Frau es isch nur wichtig
Ass mes mit Gummi mache duet
Das muess me vorhär e Bitz iiebe
Ass es denn kasch wenn aine will
Nur nimm zem iebe doch e Gurke
Denn e Banane koschtet z vill
Mac Väärs
Credit Suisse
Die Digitalisierig radiert Büro-Gummis wäg
verzwyyflet suecht me für die Lüt jetzt noch’mne neue Zwägg
Ai Firma schafft viel neui Jobs, jä so blibt d’Weschte wyss
Uss Bänker wärde Detektive, bravo, Credit Suisse!
D'Schuggerei
Grabsch e Loch im Basler Gviert, sin d Archeologe alarmiert,
und bsetze d Baustell in der Hoffnyg uf e Fund.
Am Banggeplatz im Schiinepuff dien sich tiefy Abgrind uf.
Doch wär by Bangge griiblet weiss – do laufsch uf Grund.
Tatsächlig het me denn deert unde Gräber und au Lyche gfunde.
Und d Erkläryg het me gly: S mien CS-Iiberläufer sy!
D'Stroofrichter
Bonus: Coronavirus
Zur Bekämpfig vom Coronavirus goht me neui Wäg
China baut drum neui Spitel in grad emol zäh Däg.
Au Basel isch guet vorbereitet, mir vertraue druff
In spöteschtens zäh johr goht das Biozentrum uff
D'Schuggerei
«Rüüdig schön!»: In Luzern hat die Fasnacht 2020 begonnen
1 / 9
«Rüüdig schön!»: In Luzern hat die Fasnacht 2020 begonnen
Mit einem Knall im Dunkeln hat am Donnerstag pünktlich um 5 Uhr in Luzern die Fasnacht ihren Anfang genommen.
quelle: epa / alexandra wey
Ein Zürcher an der Luzerner Fasnacht
Video: watson
Das könnte dich auch noch interessieren:
In Schweizerhalle bei Basel sind am Freitagabend möglicherweise giftige Stoffe in die Umwelt gelangt. Das teilte der Kanton Basel-Landschaft am Abend auf der Alertswiss-Internetseite des Bundesamts für Bevölkerungsschutz mit.
