Alle Jahre wieder: Die bissigen Schnitzelbänke aus den Baslern Kellern. Bild: KEYSTONE
Den FCB, Tesla und den Bachelor im Visier: Die besten Schnitzelbängg 2019
Der Jahresrückblick auf Basler Art: Es ist wieder Zeit für die Schnitzelbänke. Niemand ist sicher vor den bissigen Satiren. Das grösste Opfer ist dieses Jahr der FCB.
Dr Toni Brunner seit dr Politik adé Bim Buure dänggt är hütt no oft an d SVP Grad letschti macht e Kueh e Flaade und seit «Muuh» Är dreiht sich um und froggt: «Martullo, bisch es du?»
Babberlababb (BSG)
In Gänf stoot d Politigg mit baidne Fiess am Boode Deert isch schwindle mischle liege schwäär in Moode Au dr Maudet Pierre git zue dass äär duet liege Eerliger kasch Politigg hyt niene griege
Die Unerheerte (BSG)
Basler Politik
Em Groossrootsbreesidänt foots langsaam aafoo stingge Scho wiider sone Goof im Rootssaal by de Lingge Doch nai das Kind sitzt by de Rächte fyyn und zaart S isch s Regierigsreetli Cramer ooni Baart
Die Unerheerte (BSG)
Fussball
An dr WM kriege d Schwoobe eins an d Bagge Nach dreyne Mätsch gsehsch sii im Hotel d Koffer pagge Dr Müller schiilt zum Hotelpool und seit fruschtriert «Drbyy han ich für morn scho d Liegstiehl reserviert»
Babberlababb (BSG)
Bild: EPA/EPA
Au s Froschgsicht Özil lyydet, ou, das isch e Fruscht Drumm kuschlet er sich grad bim Erdogan an d Bruscht Do druffabe wird s am Erdogan ganz heiss Er stellt sich eifach vor, es sygi halt e Geiss
Babberlababb (BSG)
Dr Sohn vom Marco Streller isch e arme Wicht Het wäg de Masere vyyl roti Pünggt im Gsicht Dr Strelli seit ganz greizt «Mi Sohn, y seh du lyydisch» Jä aber Gopf, uff so viel Pünggt do bin y nyydisch!»
Babberlababb (BSG)
Undrem Wicky het dr FCB dr Koller Undrem Koller schyynts am Aafang wiider toller Nuur dr Burgener und au si Spoortscheff Streller Sin drotz Koller nooni toller oder heller
Die Unerheerte (BSG)
Letscht Friehlig – y ha gmaint, ych spinn Hogge im Zug fascht nur Kardinääl und Pfaffe dinn Die hänn verzellt, si kääme vo nooch und färn Und pilgere mit Glaubensgnosse bis uff Bärn Es syg halt scho e bitzeli d’Luscht wo se alli wuurd styyre Wenn e huffe «Young Boys» e grossi Party fyyre
Giftspritzi (BSG)
Die besten Ladäärne der Basler Fasnacht
1 / 36
Die besten Ladäärne der Basler Fasnacht
Querschleeger: Basel brinzlet andersch.
quelle: watson/thi
Elektro-Trottis
Hirnerschütterig, e verboogene Zingge S’Ässe e baar Dääg nur als Dringge Säggs Rippe quätscht, vier Blombe duss Do unde isch mi Glai au nimm im Schuss Vom Ussgang kumm y hai – dodaal verletzt S'het mi mit-me Elektro-Trotti uff d'Schnuure gschlezzt
Giftspritzi (BSG)
Polizei-Tesla
Bild: KEYSTONE
Deert ääne am Bärgli styygt e Räuber in's Huus D'Schugger wänn en fange, doch dr Tesla het kai Pfuus …
Giftspritzi (BSG)
Bundesrat
Dr Parmelin, dä wälschi Buur, isch sichtlig froo Het s Amt für Bildig und für Wirtschaft übernoo Bildig kennt är nit, do kann er nit vyyl rysse Jä, aber d Wirtschaft scho, dört sufft er immer Wysse
Babberlababb (BSG)
Dr Bundesroot het sich fotographiere loo E Leerling schiesst das Foti, mei sinn mir froo Will schliesslig wüsse mir no genau was passiert Wenn sich e Bollydigger sälber fotographiert
Die Haiggle (BSG)
Sie heb sich Gedanke, zem richtige Zyytpunggt gmacht, Amtsmied bini zwor nit, seid Sie drzue und lacht, Doch du merksch ass nüm, uf dr höchi bisch, Wenn dr Schneider-Ammann, uf eimol schnäller isch.
D Laggaffe (BSG)
Zem Abschiid loot dr Schneider-Ammann sichs nit nää Sait: «Doris wuurdsch mer dyyni Händy-Nummere gää?» Sii lächlet brait und iim isch s Häärz in d Hoose gheit Luegt iin aa und – «null-siibe-nüün het si gseit»
Die Unerheerte (BSG)
Klimastreik
Es streigge d Schieler jetzt fir s Klima, Sunscht goot jo nyt – d Aggzion isch prima! Schwäntzisch d Schuel bikunnsch e Stroof, Meh Freyheit gits, bisch im Arxhof.
D Emigrante (BSG)
As Lehrer muess, es sich guet läbe loh, Hesch viel Ferie, kasch am vieri heime goh, Und duets am Fritig, mit em Wuchenänd pressiere, Losch d Schieler halt, geg öbbis demonschtriere
D Laggaffe (BSG)
Bachelor
Giggli, Reerli, Plastikgschiir, gryz und quer liigt Abfall. Miggroplastik iiberaal, mir Lääbe im ne Saustall. Alles fliegt zem Auto us, nadyyrlig ooni Sorge Nur d’Fraue vo däm Bätscheler, diens in d’Bryscht entsorge!
Wildwäggsel (BSG)
Internet
Wenn mi Bueb uff Insta Daag und Nacht, Fir Likes und Lifestyle straalt und lacht, Nutzts nyt wenn ych mit iim due schimpfe, Zum Gligg kasch Influenza impfe.
D Emigrante (BSG)
Black Friday
Bild: KEYSTONE
Am BLACK FRIDAY, bim Stammdisch, mit Bier und Wyy Frog ych in d'Rundi, was das fir e Hype sell syy Do maint dr Charlie: «Dä Friday macht jeede froo, Do git's zwai fir ains – drum wird jetzt no aine gnoo!» D’Bestätigung grieg y speeter vo miinere Frau dehai: Fir mi Vollsuff git’s drey Gläbber – an Stell vo zwai!
Giftspritzi (BSG)
Politische Korrektheit
Y find, ass die «Political Corectness» e bitz e Mischt isch: Wenn «Mohrekopf» seisch, haisst’s, ass e Rassischt bisch. Wotsch «Maitlibai» kaufe, dien‘s Di als Sexischt verklaage. Nur de Fuudiweggli darfsch no ungstroft «Schwöbli» saage.
s Kuchi-Daaberettli (BSG)
Die Chinesen und der Mond
China landet uff dr Ruggsydde vom Mond Und zeigt ys Bilder, schregglig, troschtlos, unbewohnt Doch mir zwei zwiifle dra, es liggt jo uff dr Hand Die sin nit hinterem Mond, die sin in Baselland
Babberlababb (BSG)
Was bis jetzt no niemerts waiss, hän d Chineese uusegfunde. Sie fliege dr Mond vo hinden aa und wänn deert s Land erkunde. Doch iberall hets Liigestiel – s isch niene uff dr Kaarte vo Schwoobe, wo mit Diechli uff dr Sunnenuffgang waarte.
Rätschbääse (BSG)
Militär
Y kum hai – mit miede Bai mach Diir uff – do trifft mi am Hirni e Stai No´n e Schutt in Arsch – das isch nit schwär so iebt mi Soon fir´s Militär
Dr Wiggelfisch (BSG)
Bim Militär sind, d Spese überzooge, Gfeschtet, gsoffe, mitm Heli ummegflooge, Jetzt wird gschpaart, d Frau Amherd gryyfft do yy, Statt edle Drööpfe, gitts nur Walliser Wyy.
D Laggaffe (BSG)
Novartis
Bild: KEYSTONE
Myy Frau und ich, mir mache jede Herbscht, ganz stur, im Zillerdaal e soone meega-strängi Abschpägg-Kuur. Wenn abschpägge muesch, denn sottsch deert ane go! Gäll, liebe Novartis-Boss, statt noo meh Lytt z‘ entloh!
s Kuchi-Daaberettli (BSG)
Brexit
S isch schyynts dr Hauptgrund fiir die ganze Brexit-Wiire Die Gränze deert zwische de Ire und de Ire Bi däm Ire-Theaater ligtis durchuus drin Dass statt de Ire d Brite do die Irre sin
Weil wir die Kommentar-Debatten weiterhin persönlich moderieren möchten, sehen wir uns gezwungen, die Kommentarfunktion 24 Stunden nach Publikation einer Story zu schliessen. Vielen Dank für dein Verständnis!
Die beliebtesten Kommentare
Baldrian Balsamarius
12.03.2019 10:50registriert März 2019
Der gefällt mir gut (dr Hampe vo Kleihünige)
E Muslim und e fromme Jud, e Hindu und zwei Chrischte
E Atheischt und nomol ein und denn no zwei Buddischte
Die hogge zämme, lache mitenand am gliiche Tisch
Das goht im Fall, hejo, wenn kein drvo e Arschloch isch
